愛滋病自我檢測

• 「家用」自我檢測：
  呢類自我檢測由使用者進行測試並解讀結果。檢測套裝和製造商網站內一般會列明使用說明，附以圖片、照片，甚至有短片示範。
• 「家用」樣本收集：
  呢類自我檢測係由使用者自行收集血液樣本，並將樣本送到指定化驗所，由於化驗所具有標準測試水平，因此可得到確診結果。而採用呢種收集方式做愛滋病檢測嘅計劃現時喺美國可以搵到。詳情請瀏覽：
• 美國 — Home Access HIV-1 Test System

愛滋病自我檢測可以用血液或口腔液樣本進行。不同類型嘅檢測樣本，其靈敏度同特異度都各有差異，表現都有所差別。以下只係收集不同樣本嘅方法簡介，用家應以檢測套裝製造商所提供嘅詳細指示為準。

• 血液：用刺針刺指頭一下，然後擠出一滴血，用吸管或環狀採血棒等收集用具將血液轉移至檢測套裝嘅試劑中。
• 口腔液：用末端附有棉墊嘅檢測棒抹拭牙齦，收集口腔黏膜滲出液；這與吐出唾液不同。

八種獲世界衞生組織推薦嘅愛滋病檢測套裝（截至2018年7月的資料）

資料來源: Market and technology landscape: HIV rapid diagnostic tests for self-testing

• 香港目前並無特定法例規管醫療儀器（包括愛滋病自我檢測套裝）嘅製造、進出口、銷售或使用。用家可喺藥房或網上平台購買，每個套裝嘅價格介乎200至400港元之間。
• 有啲愛滋病檢測套裝嘅質素欠佳，結果唔準確。用家應從可靠嘅來源購買自我檢測套裝，並建議購買有歐盟認証、經美國食品及藥物管理局核准或通過世界衞生組織資格預審嘅產品。

檢測前準備

• 確保自我檢測套裝係運送同儲存嘅時候均維持製造商註明嘅溫度範圍內。如超出指定溫度範圍嘅時間過長，可能會損壞測試試劑，導致結果唔準確。
• 找一個令你係30分鐘內唔受干擾、私隱度高、又光線充足嘅地方。
• 準備計時器或手錶。
• 檢查包裝有冇破損。
• 檢查有效限期。
• 使用前仔細閱讀製造商所提供嘅指示。

步驟

檢測步驟因產品而異，以下只係一般步驟簡介，用家應嚴格遵照檢測套裝內嘅指示。

• 以針刺手指採集血液樣本：



1. 以肥皂和溫水（非熱水）洗手，並將手完全擦乾。
2. 拮嗰個位應喺指頭最軟嘅位置，最好係中指或無名指。
3. 用酒精棉消毒穿刺部位，等佢乾透。
4. 手背放喺枱面，手掌向上。可用同一隻手嘅手指公由手掌推按至指尖，令指頭充血。
5. 用刺針喺手指頭上拮一下。
6. 擠壓指頭，等血液由穿刺部位流出，直到攞到足夠分量。
7. 血液嘅收集方式因產品而異，請遵照製造商嘅指示。
8. 請依據製造商嘅指示等候適當時間先開始解讀結果。

• 以檢測棒抹拭採集口腔液樣本：



1. 檢測前30分鐘唔好食嘢或者使用口腔護理產品（例如漱口水或牙膏）。
2. 移除假牙或其他覆蓋牙齦嘅牙科用品。
3. 將檢測棒抹拭上下牙齦。
4. 勿將唾液吐於檢測棒上。
5. 將檢測棒放入檢測試劑內。
6. 請依據製造商嘅指示等候適當時間先開始解讀結果。

解讀結果

檢測結果嘅詮釋因產品而異，以下只係一般簡介，用家必須嚴格遵照檢測套裝內嘅指示。

一般而言，產品會有一個「結果顯示窗」顯示檢測結果。「結果顯示窗」嘅旁邊刻有C同T兩個位置。

第一步：首先睇C位置有冇顯示橫線。如果有，就表示檢測試劑已完全滲透試紙，呢個檢測結果為有效，適宜解讀；如果C位置冇顯示出橫線，咁呢個檢測結果就無效，要用過另一個新產品再進行檢測。

第二步：跟住就要睇吓T位置有冇顯示橫線
陽性結果：T位置出現橫線，表示檢測結果呈陽性，檢出愛滋病病毒抗體，表示你極有可能已經受到感染。但係呢個只係初步結果，你需進一步作血液測試嚟確認。

陰性結果： T位置沒有出現橫線，表示檢測結果呈陰性，冇檢出愛滋病病毒抗體，表示你未受感染。但係如果呢個檢測係喺空窗期內進行，你就需要喺懷疑受感染嘅最後一次接觸嘅三個月後再接受檢測，以確定結果。

如果T位置嘅橫線模糊不清，或者你對結果有任何疑問，建議盡快致電男同志測試愛滋熱線2117 1069或聯絡其他愛滋病非政府組織再進行檢測。

轉介服務

如果你嘅自我檢測結果呈陽性反應：

• 請勿慌張。依家愛滋病病毒感染者如能及早診斷同接受治理，都能夠如常生活。
• 跟住落嚟應儘早進行確認檢測，你可以選擇以下服務：
1. 致電衞生署男同志測試愛滋熱線2117 1069，安排緊急預約；
2. 聯絡非政府組織，包括：關懷愛滋，再思社區健康組織（C.H.O.I.C.E）和香港愛滋病基金會；
3. 由家庭醫生安排確認檢測。
• 確診後，你可以喺香港其中一間公立愛滋病專科門診接受治療，並向提供愛滋病病毒感染者相關服務嘅非政府組織尋求支援。

如果你嘅檢測結果呈陰性反應，你仍需注意進行安全性行為，以降低風險。如果你有持續高風險行為，建議每6至12個月作定期檢測。此外，愛滋病病毒檢測無法篩查其他性病，你可考慮前往衞生署社會衞生科診所進行性病檢測。