感染者的深層體液，如血液、精液（包括射精前嘅分泌），以及直腸同陰道嘅分泌物都有愛滋病病毒。
你的黏膜或者未曾癒合嘅傷口接觸到帶病毒的體液，又或者使用曾經被病毒污染的針筒，就有可能被傳染。直腸、陰莖口或者陰道，以及口腔內都覆蓋著黏膜。因此，愛滋病病毒可以由下面嘅途徑傳播：
在香港，超過75%嘅感染者係透過性接觸而感染愛滋病，而近年更有大約50%嘅新個案係透過同性或雙性性接觸而感染。
- 肛交係最高風險嘅性行為。接受性肛交 (做0仔) 比插入性肛交 (做1仔) 有較高嘅風險。
- 陰道性交嘅風險程度係排第二位。
- 相比肛交同陰道性交，口交 (包括含吮陰莖同舔肛) 風險較低，而替人口交並於口內射精則有更高嘅風險。此外，可以經由口交而感染嘅性病包括：梅毒、淋病 (俗稱白濁)、性病疱疹、性病疣 (俗稱椰菜花)、甲型和乙型肝炎等。
- 擁有多個性伴侶或感染性病係會增加感染愛滋病嘅風險。
- 服用消遣性藥物容易影響你嘅選擇，並減低你嘅自制能力，比如唔用安全套發生性行為，又或者發生更多粗暴性行為等等。
- 多項研究顯示，感染者如接受抗愛滋病病毒藥物治療，並能持續抑制病毒以達至無法檢測的水平，就不會透過性接觸傳播愛滋病病毒。不過若同時感染其他性病、或者性器官出現潰瘍、出血，就有可能會將病毒傳染畀其他人。
- 而未受感染嘅人會因為感染咗其他性病或性器官潰瘍，而增加感染愛滋病病毒嘅機會。
- 愛滋病病毒主要係經由共用針筒傳播。
- 吸毒用嘅鼻索器皿都有可能傳播愛滋病病毒。
- 病毒亦可以通過受污染嘅血液或者血液製品而傳播。
- 受感染嘅母親可以於懷孕、分娩和哺乳期間把病毒傳給嬰兒。
體液如唾液、汗液或尿液嘅病毒數量不足以感染他人。社交或日常嘅接觸例如錫面、一齊食飯或者共用廁所都唔會使你感染到愛滋病。此外，沒有證據顯示蚊子可以傳播愛滋病病毒。